城中鏡：爸媽勸捐 仔女力撐
蔡加讚（左）抽空同媽咪蔡李惠莉暢遊吉隆坡。
保良局董事會成員尋日為一年一度嘅籌款行動做宣傳，呼籲各界慷慨解囊，部分董事會成員嘅仔女就帶埋支票嚟撐場，一於用行動支持父母嘅善舉。
蔡加讚（左）抽空同媽咪蔡李惠莉暢遊吉隆坡。
鄭泳妮（右）創業，爹哋鄭錦鐘大力支持。
囡囡Jasmine即將到澳洲留學，紀寬樂（右）話好唔捨得。
有份捐錢畀今次籌款節目嘅保良局副主席蔡李惠莉，佢囝囝Karson蔡加讚就擔任冠名贊助，一於母子做善事齊齊拍住上。Karson就快做「老襯」，不過有關婚禮嘅安排就無暇細顧，只係話想到較為溫暖嘅南半球蜜月旅行咁話。佢又話早幾日趁住空檔，同媽咪及未婚妻汪圓圓到吉隆坡玩咗三日，遍嘗特色美食。
保良局主席鄭錦鐘囡囡Vene鄭泳妮就奉上六位數字嘅支票。Vene近來正忙於創業，成立一間「無啦啦」有限公司，專門經營網上購物。佢話好多人送禮都係為喜慶事錦上添花，而佢嘅生意則反其道而行，為種種失意事設計一系列小禮物，例如一經點燃就象徵燒去不快事嘅蠟燭，或者抹掉錯誤嘅擦膠等。佢話呢門「雪中送炭」嘅生意構思經年，除得家人嘅支持外，仲有近百位朋友嘅義務相助，仲打算喺下個月正式營運。
保良局總理紀寬樂醫生就帶同十四歲嘅囡囡Jasmine出席活動。紀醫生話暑假過後，Jasmine就要到澳洲求學，紀醫生自己年少時，因留學之故曾經喺澳洲生活十多年，對於彼邦嘅風土人情知之甚詳，所以為愛女揀選放洋留學之地，澳洲就係不二之選。佢又話雖然囡囡嘅獨立能力唔錯，然而天各一方，點都有啲唔捨得。
