政壇：搞搞政：鄧國威奸招搞掂公僕加薪

據說喺行會內，支持加薪高過指標嘅包括羅范椒芬、葉劉淑儀等嘅前公務員，仲有工會嘅鄭耀棠、李國章同張志剛，點知當日就算投票，都贏唔過鄧國威。事關鄧國威一早成功游說梁振英，仲向傳媒放晒風，話只能跟機制加薪，而梁振英咁啱去咗美國訪問，當日主持行會會議嘅係政務司司長林鄭月娥，於是拍板嘅內容，只能跟機制去做，一切不變。

不少行會成員喺會上力諫，認為公務員怨氣一旦上升至極點，政府要付出嘅代價更大，但鄧國威不為所動。有人分析指鄧國威心中嘅盤算，係估計公務員加薪一事唔會有普羅大眾支持，所以睇死公務員唔敢搞遊行，最多嘈幾日就收手，所以鄧國威抱住「過咗海就係神仙」嘅諗法，懶理埋下政治炸彈。

有了解情況人士到最近講起件事都仍然好肉緊，話鄧國威「堅定」到就算加薪方案去到立法會財務委員會投票，有議員問佢明年加薪時會否考慮埋公務員嘅士氣問題，畀張好牌佢上，點知佢都只係答話跟機制去做啦，點都唔肯講得彈性一啲。