政壇：澳洲匯水跌留學費打折
好多父母為咗令子女成材，都願意大手筆使錢供佢哋去外國讀書。其中一個最受家長歡迎嘅留學地點就係澳洲，不過學費就出晒名貴！但最近滙豐銀行公布咗一份調查報告，表示可能好快就會褫奪澳洲「學費最貴」嘅稱號。當中原因就同澳元年內兌美元匯價大跌有關。
呢份報告顯示，澳洲係全球接受高等教育最貴嘅國家，一年嘅使費盛惠三萬八千美元，計番即係差唔多三十萬港元！其實使費咁貴，最大原因都係澳元匯價強勁，喺○九至一二年期間，澳元兌美元匯價升咗五成，而去澳洲留學嘅人數都喺呢段時間減少百分之十二。不過滙豐嘅調查指，近排澳元匯價開始回落，今年兌美元已經下跌百分之十二，加上辦理澳洲簽證嘅手續簡化，預計留學生人數好快會升番。
根據呢份調查報告，美國同英國嘅學費都係全球數一數二咁貴，一年分別要價三萬五千美元及三萬美元。就連香港都入到呢個「學費榜」top 10，一年學費總共二萬二千美元，即係約十七萬港紙。
