政壇：EQ勁讚柏林自助租單車
葛珮帆暢遊柏林樂而忘返。（受訪者提供）
趁住立法會放暑假，議員「EQ」葛珮帆早前就同老公去咗德國柏林玩，佢話非常欣賞柏林嘅自助單車租用系統，當地市民只要一打開智能手機入面嘅應用程式，就可以搵到邊度有單車可租，仲可以即時完成租用同付款過程，比英國倫敦及中國杭州嘅單車租用系統更加先進方便。
葛珮帆暢遊柏林樂而忘返。（受訪者提供）
EQ話柏林政府視單車為市民日常交通工具，喺城市規劃時特別考慮單車路嘅位置，亦為單車設有專用嘅紅綠燈，而柏林政府亦善用橋底空間，容許酒吧、餐廳同商店租用橋底位置，等佢哋可以有多啲地方做生意。特區政府成日話唔夠地方，佢建議香港參考外國例子，利用天橋底釋放更多空間。
