政壇：工聯會頒獎外判商唔吼
郭偉強（左一）同鄧家彪（右一）同獲獎嘅公司代表合照。
工聯會尋日搞咗個開明僱主嘉許禮，目的係表揚啲承諾會保障僱員權益，令員工唔受剝削嘅政府外判商。但點先算係開明僱主呢？原來工聯會向佢哋發出問卷，調查佢哋對遣散費嘅睇法，基本上有回覆嘅就有喇。不過經過一個月，一百零八間政府外判商中，竟然只有五間回覆，莫非啲人信唔過工聯會，怕被出賣？似乎工聯會真係要諗諗計囉！
郭偉強（左一）同鄧家彪（右一）同獲獎嘅公司代表合照。
但無論如何，呢個嘉許禮嘅原意其實係好嘅，皆因立法會議員鄧家彪話，政府依家對外判商嘅政策係冇獎只有罰，所以對嗰啲做得好嘅外判商唔公平，而且政府各部門嘅招標條件都唔同，當中做得最唔好嘅就係民政署，因為佢哋經常以價低者得嘅方式，漠視用家意見，至於政府亦唔應該放任咁外判。而同場嘅另一議員郭偉強就鼓勵外判商，話輸入外勞唔係解決人手不足嘅方法，善待員工先可以挽留人才喎！
