政壇：戴耀廷粉絲晒冷慘敗
設計圖片及對白
「幫港出聲」打正旗號反對「佔領中環」，尋日佢哋嘅召集人周融同「佔中行動」發起人戴耀廷就喺電台節目首度交鋒。當主持人問到雙方依家有幾多人參與，換言之，即係叫佢哋「晒冷」啦，咁周融話幫港出聲成立短短幾日，佢哋喺網上已經有超過四千五百個支持者。咁佔中呢？依家只有一千人簽咗佔中意向書。嘩！人數明顯少一大截，但戴耀廷仲要死撐話支持嘅方法同計法唔同，即係唔認支持者少啦！
設計圖片及對白
賴計法有分別
周融話已經叫咗大家唔好隨便喺社交網站Facebook㩒「like」（讚），要真係支持先好做，點知都有咁多人，所以人哋都同佢講，作為建制派網站冇乜人做到，都算係一個奇迹嘞！支持者唔夠人多嘅戴耀廷就話，佢哋冇主動叫人簽意向書，但依家都有一千人簽咗，又話簽得意向書嘅都要講明點參與佔中，當中有一半人表示會公民抗命，唔同喺網上畀個「like」咁易。
面對周融嘅批評，指佔中係「邪道」，會傷害香港人，戴耀廷就形容香港依家就似撞緊去冰山嘅船，有人喺度跳舞食飯，有人就打爛香檳杯去敲警鐘提醒大家，而佔中就正正係呢個敲響警鐘嘅人，去提醒船長咪撞埋去。不過周融就唔同意，仲鬧佔中係攞香港人嚟做威嚇北京嘅人質添！
對於外界質疑佔中最終可能變成暴力衝突，為咗令行動可以和平非暴力進行，戴耀廷就話佢哋已經搵心理學家寫教材，教佔中參加者喺面對挑釁時點樣管理情緒。
如果照住做，咁要上幾多次堂先有效果呢？有冇用睇嚟真係要到時先知嘞。
