男子衝馬路攔車伸冤

昨午一時許，姓梁男子（三十歲）冒雨在長沙灣道消防局對開，衝出馬路在三條行車線間踱步，兩輛巴士及一輛客貨車恐將梁撞及，立即停車，梁突然撞向其中一輛巴士車身後躺臥地上，大叫大嚷，其中姓吳（三十八歲）巴士車長打傘落車了解情況及勸說。梁隨即情緒激動，站起身將其背囊內衣服雜物掏空掟落地，又舉起銀包大叫「話我做賊，我冇錢，各位街坊可以做證」。

「唔好屈我，我做正行o架」

期間，被截停客貨車趁其不為意突圍，梁一度飛跑攔截但不成功，之後再走回路中激動大叫：「我唔想被判監，點解搞我，個袋乜都冇，唔好屈我，我做正行，搵三百蚊啫。」

三男一女警員接報到場，替梁檢回衣服及雜物入背囊，再向他了解事件及勸其返回路邊，但梁無動於衷，繼續在馬路中行走，約十分鐘後，多名警員趁機合力將其按落地，扣上手銬拖回路邊，召救護車將他送院檢驗。警方正調查梁鬧事原因，現列傻人發現個案處理。