SUN搞作：打橫嚟講：大龍鳳≠政治活動？
香港，進入咗一個精神錯亂的奇怪時空，一切沒邏輯的悖論，都變成義正詞嚴的大道理。
講粗鄙語的林老師被圍剿，被指教壞細路，但講大話的廢柴政府高層，卻無人追究佢的謊言更具禍港之能事。頂級荒謬至極！
現坊間，不再思索為何一個自稱「政治組織」的團體（香港行動），不顧香港安危，係要「追殺」一個小學老師？佢哋高調搞大龍鳳，算不算是「政治活動」呢？
就是為了界定八月四日那場聲討林老師的大集會，監警會秘書長朱敏健認為係「政治活動」，卻被「香港行動」召集人兼「愛港力」成員嘅過氣差人冼澤正，在網上鋪載一張「燒豬」相片招呼！幾低級幼稚！
呢次搞到「撐林」與「批林」雙方晒馬嘅大場面，當然係「政治活動」啦！
嗱！一直坐在台下，每當聽到現場有人問候台上發言的陳偲嫣時，佢就笑到兩個膞頭震晒的休假警司劉達強跑上台講話，第一句佢說：「我一直都唔想參與政治……」第二句就說：「但係，當我睇到青天白日滿地紅、雪山獅子旗、港英龍獅旗嘅時候……」第三句：「我就唔可以唔企出嚟嘞！」
哦！為了見到呢啲咁甚具政治性的旗幟而站出來，唔係「講政治」，唔通講「美術設計」？
嗱！好多黑幫社團大佬，總愛趁老母生日，喺酒樓擺大壽，乘機振家聲，又或搞婚宴，實則係收 或紮職大龍鳳，畀差人冚檔幾時會聽過有人認係「非法集會」？所以，聚會個牌頭，主辦單位個身份，都會有人裝假掩飾的。正常的判斷，係睇事實的真相，尤其是背後動機，即如林老師講粗語的原委！不要被人渾水摸魚兼當傻仔咁愚弄你呀！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
