SUN搞作：少膽虫手記：作嘢作得假
「Trash！Trash！Trash！」，「少膽虫，班人嗌咩呀？」淫賤黎喺《狗噏24》直踩墨鏡大導係無良心嘅垃圾之後，壹全霉門口就聚滿成班大導嘅粉絲，話要搵淫黎算帳。「我聽到喇！佢哋嗌Trust呀，開心死我喇！」好彩撞正淫黎眼矇耳聾，唔係隻虫又要硬食兜巴星！
好嘅唔靈醜嘅靈，淫黎突然望住少膽虫嘅重要部位，握緊拳頭，少膽虫望望腦細，再望望自己條褲，本能反應下，即刻手掩「小虫」跪低，「腦細，你做咩事呀？」淫黎但笑不語。腦細單手舉高，口水欲流未流，少膽虫膽顫心驚，半晌，淫黎終於開口，「尋日長居喜瑪拉雅山尖嘅道德大師使出擒拿絕招，一手撚得喺你褲鏈外面搖搖欲墜嘅職員證，我見佢咁手到拿來，諗住偷吓師啫。」
少膽虫大惑不解，「腦細，我喺你面前咁坦蕩蕩，你仲有咩唔知，需要拎我張證嚟睇？」淫黎聽了，一巴冚落條虫度！「死蠢，咁你都仲唔明！道德大師仙氣過人，御駕蒞臨指點江山，點出壹全霉百病叢生，源於成日老作！拎你張證，就係想睇吓你幾時入職，睇吓你作嘢作得咁假，係咪尋日第一日返工呀！」少膽虫聞言，一托臉上畀淫黎打爛嘅黑色粗框眼鏡，欲哭無淚。
