SUN搞作：SUN官場現形記：北上執黃金
以為淨係得內地有氣功推拿師，咁你就錯嘞！查實香港政府入面，一班高（狗）官嘅「推拿」技術都好勁，見衰嘢走夾唔抖，有着數蜂擁而上！尋日李衞潛入「嗰道門」，親眼目睹以下呢一幕……
淋淨：波波，你呢排民望大跌，當係畀個機會你將功贖罪，趁H7N9就殺到，你先北上外訪，睇吓雞場可以點改善，順便打番個白鴿轉，洗洗你近排啲衰氣，好唔好？
波波：（淆底狀）疫……疫症？我之前撞車，條頸仲有啲痛，睇怕我都係去唔到喇……仲有最近好多市民強調城市發展要中港區隔呀！我諗我唔係適合人選嘞，淋淨你民望咁高，不如你代我哋去啦！
淋淨：（迴避狀）我……覺得呢件事好有意義，但係我搞緊《家．是香港》，一定要身繫香江㗎！係喎，永文，食物衞生你管㗎喎，波波唔想去，不如就你去啦！
永文：（顫抖狀）er……上面太……太多黃金喇，我唔要得，所以唔去得！
波波：（轉驚為喜）咦？北上真係有金執㗎？咁我有啲興趣喎！
淋淨：咁就你去啦！
波波：（充滿興趣）執幾舊黃金返嚟，仲好過囤地呀！
永文：我係講雞場入面「遍地黃金」，一唔小心中招就慘喇！一路順風呀波波！
