城中鏡：狄志遠信林老師爆粗
狄志遠童心未泯，出席活動時猛吹肥皂泡。
喺旺角街頭爆粗辱警而連日見報嘅小學女教師林慧思，網上再有短片瘋傳，指佢以廣東話粗口「×你老母」問候警務人員，但由於短片影唔到林老師嘅正面同口形，加上佢否認，所以雙方支持者一直口同鼻拗，連建制派電腦專家都唔敢斷言段片嘅真確性。不過，家庭教育學院主席狄志遠就擺明唔撐，仲突然專家上身指證段片嘅真確性「表面證供」成立，林老師好難唔認喎！
狄志遠童心未泯，出席活動時猛吹肥皂泡。
身為人父嘅狄志遠都有留意呢段中文版嘅問候短片，笑言片中人嗰句「×你老母」無論聲線、現場人士嘅前後反應，以致段片嘅連貫性都相當脗合，「睇落係真o架喎！」佢仲話呢兩句粗口令大眾對老師嘅形象產生相當負面嘅影響，實在好難撐得落。
沙田區議員龐愛蘭嘅囝囝雖已二十歲，唔怕老師講粗口會教壞佢，但對林老師出動四字真言辱警坦言「接受唔到」，大嘆好彩囝囝咁多年都冇遇過咁嘅老師。佢希望社會唔好再聚焦林老師身上，而係從呢件事反思點樣為之好老師，一人少句喇!
