城中鏡：張詩培細時由家姐孭來港
張詩培（右）同胞姊張楚瑜五官酷似，笑容更一致。
潮州人一向都好重視親情，身為「家己冷」嘅香港青年聯會常務會董Joanne張詩培都唔例外。日前佢移咗民去加拿大嘅大家姐Juliann張楚瑜返港度假，當然要趁機一聚，大家摸住酒杯底，細數兒時趣事。睇佢哋兩姊妹笑容咁一致，就知佢哋感情幾咁好喇！
張詩培（右）同胞姊張楚瑜五官酷似，笑容更一致。
Joanne話家有五姊妹，自己排行第四。想當年佢只有八個月大，舉家由汕頭來港定居，當時就係由Juliann孭住佢，一步步咁由羅湖橋走到嚟香港，所以二人感情特別深厚。佢透露，父母同三位姊姊早年已移民加國，細妹就定居日本，五姊妹雖各有各忙，但每年最少都會見一次，大家互相探訪，順便當旅行。
身形依然好fit嘅Juliann，原來已有一個十八歲大嘅囝囝，佢正忙於為愛兒開學打點一切，但幾忙都好，不忘返港同妹妹暢敍一番。Joanne就話最近同老公徐永安忙為愛巢裝修，又甜笑話搬屋係老公嘅主意，事關老公希望佢住得舒服啲喎！
