設計圖片

財爺鬍鬚曾尋日又發表每周網誌，今次唔再糾纏喺財政儲備「估錯數」，而係搞爛Gag咁話最近有報道指，荷蘭有科學家研究出全球首塊「人造漢堡扒」，試食後發現人造牛「有口感但無牛味」，忽發奇想香港土炮牛丸既然可以做到「有牛味但無牛肉」，相信一眾喺香港賣牛丸嘅「專家」可協助當地科學家，解決人造漢堡「無牛味」嘅問題，實行幫香港牛丸「走出去」。

設計圖片

嘩！有冇搞錯，無牛肉牛丸唔係菠蘿包冇菠蘿咁簡單，事件被揭發後，政府相關部門都話要跟進係咪造假，鬍鬚曾竟然仲攞嚟當係新發明、香港品牌咁向外Sell，究竟佢知唔知醜o架？

鬍鬚曾呢頭搞完Gag，原來正文係想借「港式品牌」喺內地口碑不斷提升，加上內地近年愈來愈重視食物安全，鼓勵港商利用港式品牌、管理及營銷優勢進軍內地市場。好似佢喺文中提到早前訪問廣東省，參觀一個港商開設嘅魚場，發現港商只要肯動腦筋，原產自澳洲嘅寶石魚都可以一年四季喺室內魚池出產，品質仲好到可以整日式刺身生食添！

佢吹完一輪水之後，都冇「過兩招」畀賣牛丸嘅香港老闆，可以點樣同外國科學家合作賺多啲喎！

第一手消息請下載on.cc東方互動iPhone/iPad/Android/Windows Phone Apps