政壇：貪曾效應 官員忌社交網
「貪曾」前特首曾蔭權爵士在任七年無乜叻，最叻就係整色整水做政治化妝，其中喺一○年九月設立名為「上亞厘畢道」嘅官方社交網站，諗住可以拉近同網民距離，但事實證明貪曾此舉非但無助收集各方意見，反而自製平台畀反政府者喺回應時日鬧夜鬧，據聞新政府都有吸取教訓，唔多敢用社交網站，以免自動獻身畀人鬧。
只寫網誌避鬧
事實上，新政府上至特首，下至問責局長都只有個人網誌，無再用社交網站，有個別高官好似財爺鬍鬚曾、民政事務局局長曾德成同發展局局長陳茂波，基本上每周都會撰文，至於網誌內容有幾充實，就見仁見智嘞！
身兼扶貧委員會主席嘅政務司司長林鄭月娥將會喺九月公布貧窮線，據聞當局依家諗緊公關安排，收到嘅建議不外乎係拍片、落區探訪等，絕少人提議特別要開個社交網站專頁公布扶貧各大舉措，相信呢個做法都係免得步貪曾後塵，畀網民鬧到遍體鱗傷喇。
