政壇：陳岳鵬巨細申報免上身
陳岳鵬強調無意跳船，會繼續緊守崗位。
勞工及福利局政治助理莫宜端以照顧一對年幼子女為由辭職，令成功過渡新政府嘅政助得番兩個，外界亦憂慮事件會唔會觸發新一輪「跳船潮」。同屬成功過渡嘅政制及內地事務局政助Ronald陳岳鵬就強調無意跳船，一班政助嘅士氣亦冇受到影響，會繼續緊守崗位咁話。似乎預示自己長做長有喎！
陳岳鵬強調無意跳船，會繼續緊守崗位。
自言工作冇衝突
不過，政府近日推出問責官員利益申報新指引，連「私交好友」同曾經「欠下人情」嘅人都一律納入「私人利益」定義，相信又再嚇走一班原本有意加入政府嘅勇武之士。Ronald就話未驚過兼冇壓力，因為所屬嘅局主理政制、內地事務同人權，相信自己嘅私人利益冇咁易會「上身」，如果有疑惑就有理無理都申報咗先，睇嚟佢身家相當清白，唔怕申報。
至於佢嘅上司、副局長劉江華亦強調，雖然只係跳槽入政府半年，但都冇跳船意圖，仲慶幸得到同事幫忙，半年來嘅工作都好暢順，會繼續努力。
