政壇：張建宗祝莫宜端做好媽
張建宗話挽留咗莫宜端好多次都唔成功。
勞工及福利局政治助理Zandra莫宜端辭職惹來問責制高官「跳船」疑雲。勞工及福利局局長張建宗尋日就首次親口回應事件，佢都話Zandra的確係因為想多啲時間做個好媽媽，要多啲時間照顧年幼嘅仔女先辭職，絕對唔係藉口，唔涉及政治因素或者「跳船」，叫大家唔好作任何揣測咁話。佢仲話已經盡咗好大努力挽留Zandra，但都唔成功，會尊重對方決定。
張建宗話挽留咗莫宜端好多次都唔成功。
多次挽留不成功
張建宗尋日出席職業性失聰補償管理局舉辦的展覽活動後，被傳媒追問Zandra辭職嘅理由，佢話過往同Zandra合作無間，對佢辭職好惋惜，「知道佢（Zandra）呢幾個月為呢件事好煩惱，兩樣嘢（工作同仔女）兼顧好困難，同佢傾咗好幾個月，多次挽留莫女士。但佢取捨之下作咗決定，以家庭為重。大家唔好揣測其他，無第啲因素，我可以真真正正同大家講佢希望做個好媽媽。」佢又話今個月二十三日係Zandra最後一個工作日，二十四日就正式離任。
