政壇：拗普選方案 白鴿又爆內訌
設計圖片及對白
白鴿黨主席劉慧卿同前主席「鐵頭仁」何俊仁日前先後發表「普選目標非公民提名」同「公民間接提名」等「露底」言論，自揭政改立場底牌，即時畀其他泛民黨派鬧爆，指摘佢哋違背真普聯立場。白鴿黨尋日開記者會宣傳該黨今日出發嘅台灣考察團，團長胡志偉重申白鴿黨支持真普聯提出嘅三個方案及「佔領中環」運動，副主席蔡耀昌仲話佢哋只係發表個人意見，其言論並不代表白鴿黨立場。吓，咁都得？唔通白鴿又爆內訌？
設計圖片及對白
卿姐繼續播火種
白鴿黨受盡千夫所指，蔡耀昌第一時間跳出嚟澄清，話公民提名現階段只屬抽象概念，具體運作細節未定，認為坊間可以繼續討論方案利弊。佢之後愈講愈嬲，話睇唔到白鴿黨有違反真普聯原則，批評有人企圖扭曲該黨言論，又寸爆有人郁啲就要挾退出真普聯，都唔知係咪想製造泛民分裂。
胡志偉就話，真普聯三個方案中只有兩個包含公民提名元素，證明唔同方法都可以達至「普及而平等」，現階段白鴿黨唔會作出任何結論，亦都唔覺得佢哋已經露出底牌。佢話考察團屆時拜會當地政黨時，除咗會參考對方喺非選舉年嘅籌款經驗，仲會了解台灣總統選舉中「公民連署」嘅實際操作，足以證明該黨並唔係放棄公民提名喎！
雖然其他黨員不斷幫兩人「滅火」，但卿姐下晝出席活動時繼續散播火種，話白鴿黨支持公民提名，不過即使最終方案冇公民提名，都唔代表選舉唔符合「普及而平等」嘅原則。至於點樣先可以確保選舉符合「普及而平等」，卿姐就冇回應到，淨係爆出一句「全世界有公民提名嘅地方只得兩個」。唔知佢今次所講又代唔代表該黨立場呢？
