SUN搞作：少膽虫手記：淫賤黎想被打…「救」
「打……救我哋喇！打……救我哋喇！」淫賤黎喺房內忽發瘋語，唔通佢又唔記得去針脷？身為下屬，少膽虫點都要入去問吓發生咗咩事，點知房門一開，真係嚇得少膽虫不知所措，只見淫賤黎赤裸上身，插滿利針，恍似乩童上身，在枱上大跳大叫。「腦細，究竟發生咗咩事？」少膽虫口顫顫地問。
一聽少膽虫呻吟，淫賤黎就醒了過來，「少膽虫，我哋呢排得罪人多，無論係香港家長之首，定係內地記者，個個都嚟圍插《爛果》，我日日都驚會被人尋仇，搞到好似得我孤軍作戰，我空虛、我寂寞、我凍，我想有人嚟打救我！」說畢，淫賤黎雙頰泛紅、上前抱緊少膽虫︰「少膽虫，畀啲溫暖我！」面對淫賤黎突如其來的進攻，少膽虫頓時手足無措，但係為咗名聲、貞操，少膽虫又不得不再講大話︰「腦細，唔好咁喇！其實大部分問題我都已經解決咗，無事o架喇！」
正當淫賤黎要展開笑顏之際，肥豪急急衝入房，少膽虫頓覺有不祥之兆，「腦細，大鑊喇！《爛果》登嗰篇專欄，畀鼠王芬話係惡意中傷，要我哋道歉同澄清！」肥豪氣喘喘道。「少膽虫，你整蠱我，又話一切你都已經搞掂？！我一定要整……蠱……番你。」淫賤黎目露凶光，睇嚟少膽虫今晚又有排忙……
