雲集逾五百位才俊精英嘅菁英會，周二喺灣仔會展舉行第六屆執委會就職禮。立法會議員梁君彥嘅兒子宏正榮任主席，高官、政商界名人、社會賢達紛紛到賀。宏正為瞓身會務，已向父親請假一年，佢嘅頭炮任務係「尋人」，為下月舉辦嘅博鰲青年論壇（香港）訪尋重量級神秘嘉賓。

菁英會就職禮
雙喜臨門
新任主席梁宏正（中）明年升呢做爸爸，可謂雙喜臨門，創會主席施榮忻（右二）、榮譽主席白富鴻（左三）、洪為民（左二）、楊華勇（右三）、副主席莊家彬（右）及鄭重科（左）齊齊祝賀佢。

橙汁代酒
廠商會會長施榮懷（中）為怕由美國返港度暑假嘅兒子湧樂（左）及仲樂（右）太早學飲酒，呢晚只准兩人飲橙汁。

宴請好友
名媛傅明憲（右二）呢晚以菁英會會員身份宴客，好友郭秀雲（右）、富豪趙世曾千金趙式芝（左二）與波爾錶太子女楊如芯（左）齊撐場。

幹勁十足
執委李煥明（右二）、鄺晶晶（左二）與會員陳龍盛（左）、謝嘉恩（右）負責迎賓，忙足一晚，真係幹勁十足。

潮州四傑
四名潮州男人同聲同氣好啱傾，左起：中華總商會會董張俊勇、潮州商會青委主任葉振南、潮青名譽參事陳光明及廖創興家族後人廖偉麟。

至親支持
盧金榮（右二）榮升常務副主席，下屆接棒在望，除咗太太Patsy（右）支持外，家姐Esther（左）及身為廠商會副會長嘅姐夫吳永嘉（左二）亦全晚做啦啦隊。

舉杯暢飲
餐飲聯業協會會長黃家和嘅兒子黃浩鈞（左）係第十五期菁英新丁，與「師兄」叙福樓集團執董黃傑龍碰杯。

第一手消息請下載on.cc東方互動iPhone/iPad/Android/Windows Phone Apps