是咁的，早幾日喺飛士卜見到有個群組，見到「谷M」呢個字，作為男人嘅我梗係唔明呢個潮語點解。喺追查之下，原來「谷M」呢個潮語早已喺女性圈子流傳，意思就係女性月經遲遲唔嚟，谷住谷住好辛苦嘅意思。「M」嘅意思係Menstruation，即係月經。「谷M」除咗谷住辛苦之外，仲可能會痛，更會導致到個人非常燥底，郁啲都會發爛渣。

呢個世界得兩種性別，唔係男就係女。有人話男人係嚟自火星，女人係嚟自水星，即係水火不容。但今時今日，男女平等，女人隨時撐起半邊天，男人又可以做煮飯公，或者索性咬老軟做鵪鶉。就睇香港啲政黨咁多女主席就知香港絕對係男女平等。好似最近有個出名激進嘅政黨，選咗個香港小姐做主席，即刻感覺唔同晒！不過話雖如此，男女喺生理構造上真係有好大嘅唔同，而呢啲生理構造嘅落差，又真係好可能會影響到工作能力。其中男人永不明白嘅就係女人「谷M」嘅時候，到底有幾難受。

女人「谷M」係一種非常危險嘅狀態，好容易對身邊伴侶或同事構成威脅。如果你嘅上司或老細係女人，就會完全心領神會，呢種每個月一次嘅驚嚇，月經隨時變月驚！有時「谷M」都會令女士帶嚟懷孕疑雲，尤其係喺不安全性行為之後「谷M」，除咗本身嘅徵狀之外，仲會加埋緊張同擔心，坐立不安，令到情緒更受困擾，對周邊人士嘅破壞力更強！尤其現在正值暑假，各位少女更要小心搞出人命，情況嚴重就梗係要睇醫生啦……

男人講「M」真係唔係咁啱Channel，啲女人經常怪責男人唔明「M」有幾咁煩，但係同樣道理，女人亦永遠唔明白男人對另一個「M」嘅執迷，呢個「M」並唔係Money，而係Masturbation，即係打飛機！呢個亦係女人永遠不明白嘅事！不過今時今日香港地，管治質素衰到貼地，再加埋啲牛鬼蛇神組織喺度搞搞震，真係無論男女，香港人人躁過「谷M」！

第一手消息請下載on.cc東方互動iPhone/iPad/Android/Windows Phone Apps