政壇：搞搞政：升任社聯一哥 蔡海偉免入熱廚房

蔡海偉喺九二年加入社聯，現職社聯業務總監（政策研究及倡議）。社聯主席陳智思同現任行政總裁方敏生尋日一齊宣布，蔡海偉會係社聯新任行政總裁，今年十二月一號履新，任期三年。陳智思話自方敏生五月宣布今年年底離任後，就開始進行公開招聘，一共收到十二份申請表，篩選出四位申請人，最後揀咗蔡海偉，因佢擁有逾二十年豐富經驗、熟悉現時社福政策同有較強溝通能力。

方敏生都話蔡為人斯文、有正義感，係一名謙謙君子，加上多年擔任社福政策嘅工作，係絕佳人選。咁咪即係話政府走寶？反轉頭其實係蔡海偉執到寶，因為方敏生都做咗十三年，呢份工起碼有足夠時間畀佢發展所長。

政府三日前宣布政治委任官員日後要公布親朋戚友嘅私人利益，問舊年差啲入咗政府做副局長嘅蔡海偉會唔會因為咁唔再見問責官員嘅工，佢笑住話自己好基層，對佢無乜影響，但未來幾年會全心全意喺社聯工作，服務同改善弱勢社群嘅工作，做好同政府、商界同社福界嘅溝通。