政壇：陳光明遊西藏精神爽利
潮青名譽參事Johnny陳光明幾乎遊遍神州大地，只差西藏，日前終於圓夢，同一班海外企業家好友同遊拉薩。佢哋年前曾捐錢資助日喀則一間山區小學建校，今次順道睇睇。為怕高山症，Johnny袋定成包抗高山症藥，點知最後一粒藥都唔使食，反而好友們頭痛又頭暈，最後佢十足醫生一樣，派藥畀大家食。
初次到訪拉薩，陳光明慶幸未有出現高山症反應。（被訪者提供）
首次訪拉薩，唔少得去布達拉宮朝聖，宮內供奉唔少聖物，平日甚少對外開放，Johnny得好友打開方便之門，有緣一睹瑰麗珍寶。離開布達拉宮時抬頭一望，天上驟現一抹彩虹，係咪天降異像就唔知嘞，不過拉薩人話，呢個情景難得一見喎！拉薩近年經濟起飛，藥廠同旅遊業特別旺，Johnny都拉隊考察吓，發掘商機，仲順道買咗天山雪蓮做手信。考察完畢，唔少得歎地道菜，藏餐中以燒牛肉、羊肉最著名，藏民會用藏藥煮牛肉，十分惹味，Johnny就大讚冬蟲夏草湯夠滋補，飲多幾碗，頓覺精神爽利！
