政府問責官員同行會成員接二連三出事及呈辭，唔知佢哋辭職後最放唔低係乜嘢呢？香港黃金五十創辦人林奮強尋日接受一個網上平台訪問時就話，佢呢一生最佩服自己媽媽，而最耿耿於懷係部分傳媒喺佢宣布辭職行會後，仍打電話畀佢現年八十幾歲，且患有阿茲海默症，亦即腦退化症嘅媽媽喎！

林奮強

佢仲提到被指涉及「偷步買樓」同向特首請辭嘅事。佢話自己唯一強項係做分析同研究，所以一心創立黃金五十，以呢個方式回饋社會。至於被一張報章誣陷發表歧視新移民嘅言論，佢就話冇歧視過任何人，呢件事曾經令佢感委屈，但做人冇可能因為受咗啲委屈就乜都唔做。但事情至今，佢最想感謝家人嘅支持，而佢服務香港嘅決心，亦唔會因此而動搖咁話。

第一手消息請下載on.cc東方互動iPhone/iPad/Android/Windows Phone Apps