政壇：戴耀廷何濼生斯文過招
日前成立嘅「幫港出聲」話要搜集十萬人簽名、表態唔支持違法嘅行為，擺明同佔領中環行動打對台。兩個組織嘅成員尋日首次喺電台節目過招，「幫港出聲」派成員何濼生出陣，應戰嘅係佔中雙子、發起人戴耀廷同陳健民，可惜雙方舌戰冇乜火花。
本身係嶺南大學公共政策研究中心主任嘅何濼生同戴耀廷、陳健民一樣都係學者，唔知係咪因為咁，大家比試起來都好斯文。戴耀廷被質疑佔中破壞法治時就話，佢哋係以有限度嘅非法行為爭取民主，而且會承擔罪責。何濼生就堅持佔中時嘅濫權行為係踐踏緊市民權利，會傷害到一啲人，亦都傷害守法精神，唔同得過馬路衝下燈咁話。
何濼生又認為佔中會令好多人聚集中環，不排除會出現唔和平嘅事件，只要有百分之一機會出事都應該避免。陳健民就反駁話任何大型活動，如足球賽、大型慶祝活動等都可能會有呢百分之一機會出事，唔一定係佔中。
