政壇：洪永時夫婦撐乖仔創業
「澳門大亨」洪永時太太Deborah同兒子洪澤禮合資嘅拉麵店前日開幕，洪永時話阿仔有興趣創業，做爸爸嘅當然要支持，佢話：「個仔同我講想開拉麵店，我覺得都係時候畀佢出去闖吓，咁Deborah聽到都話支持入少少股，一家人嘛！」咁有冇做生意心得教阿仔？洪永時就話：「我唔會主動教佢，叫佢有問題就問我。」
洪永時（左起）同太太一齊撐兒子洪澤禮麵店開幕。
Deborah嘅模特兒公司旗下model洪子崎同男友徐東海一齊現身撐場。洪子崎透露下月就係同男友拍拖三周年，二人會去東京旅行慶祝，更希望可以一嘗着和服影相嘅滋味。問到可有結婚計劃？佢笑住話：「我太細個喇，問我呢個問題有啲尷尬，不過有時我經過啲珠寶店，都會特登指住啲鑽飾同佢講好靚！」
