政壇：培華教育基金新血登場
香港培華教育基金會成立三十多年，人稱「四叔」嘅恒基地產主席李兆基一直出錢出力，致力培育同扶掖後進。尋日培華舉行年度午餐會，四叔致詞時首先提到培華最新發展，話培華過去資助、主辦同協辦教育項目共有五百八十八個，共培訓近七萬個領導人才，最近又聯同李兆基基金捐款，資助一千名中西部大學校長，到歐美著名大學實地考察，預計明年底會有超過五百名校長完成研修。
李家傑（右）陪住爸爸李兆基（左）出席午宴。
四叔其後又講到培華嘅組成，表示培華成員有八十多歲嘅，較年輕嘅亦有六、七十歲，急需補充新血，幸得今年有九名新成員加入，佢哋平均年齡只有三十多歲，個個學識豐富，年輕有為。
九人中其中三個生力軍就係港區全國人大代表霍震寰三名子女，分別係霍思緯、霍啟中同霍啟文，其中靚女霍思緯依家有份設計珠寶首飾，正搵人設計介紹網頁，稍後亦會考慮搵地方開舖，但佢承認依家地舖租金較貴，所以要小心考慮位置。另一名生力軍就係剛毅集團主席王敏剛嘅長子王浩存，王敏剛話阿仔依家喺摩根士丹利工作，又話之前曾搵過佢幫自己手，但慘食「檸檬」喎！
同場仲有協成行集團主席方潤華，協成行集團董事總經理方文雄同佢兒子方添輝三代同堂出席午宴，方潤華喺午宴前叫咗半杯可樂加檸檬飲，之後仲送咗一本「養生之道」畀記者睇添！
