政府有項不成文嘅「六六規定」，即一位社會人士最多只可出任六項公職，而出任同一公職嘅年期以六年為限。但喺人手短缺嘅情況下，唔少人都擔任超過六項公職。至於年期方面，最近就屢次發生主席要連任再連任嘅事件，例如市建局、醫管局等，而政府尋日公布，Jack蘇澤光連任香港貿易發展局主席多一年，至明年九月尾。不過計埋明年，Jack蘇就會做夠七年貿發局主席，超出咗「六六規定」。

設計圖片

多一事不如少一事

點解政府要畀Jack蘇任期超標呢？聽聞咁樣已經係政府嘅最佳選擇，皆因有政界人士透露，特首CY梁振英為免搵梁營色彩濃厚嘅人士做呢啲公職位置，本來諗住搵中立少少或唐營人士擔任，人選包括我哋提過嘅恒隆集團董事總經理陳南祿、商界立法會議員林健鋒同工業界嘅梁君彥等人。點知陳南祿任職公司嘅董事長陳啟宗係死硬「梁粉」，好容易就會引起唐營猜疑，而唐營內部又爭崩頭。

為咗減少彼此嘅紛爭，以及顧慮唐營人士嘅不滿情緒，CY就決定多一事不如少一事，搵番Jack蘇嚟頂多一年，咁就大家都Happy啦！

而據聞唐營中人都認為，Jack蘇係佢哋可接受嘅人選喎。

至於政府委任超標人士再連任有關公職亦非首次發生，如市建局及醫管局都曾出現過。不過有關人士話，今次委任Jack蘇續任一年的確特別，但可以畀政府喺呢一年時間入面再覓人選，做法係不二之選喎！

第一手消息請下載on.cc東方互動iPhone/iPad/Android/Windows Phone Apps