今屆香港特區政府就任只不過一年，便屢出醜聞，令港人見到就慶。
一個廢柴政府之所以廢，又不受群眾愛戴，係總有原因的！
嗱！香港特區廢柴政府之問責班子裏的劏房波衰完一鑊，推個老婆出嚟頂外，又嚟一鑊被揭發囤地，佢慌亂得再推「家人的家人」做擋箭牌，搞到全城喊打，亦引出「問責官員申報利益」的迷思！
香港廢柴政府愛玩語言偽術，於是，喺八月頭，鬼鬼祟祟的在自家特首辦網上發布「問責官員申報利益新指引」，話佢哋鬼祟，是因為無聲無息的鋪上網便當向外公布，而無任何官員出面或搞個記者招待會「開誠布公」，向大家講解細節；其實，呢個所謂「利益指引」的內容，真係屎到無朋友，其中一項牴觸申報的，包括「私交好友」，如斯低水平、無法制常識的規定，叫人看得出呢個廢柴政府有幾廢囉！
喂！大佬！點為之係「私交好友」先？「無私交」的「朋友」又點計數？另外，仲好笑，就係「曾受恩惠或欠下人情」的，吓！「欠下人情」？係扶過阿婆過馬路吖？定係飲宴的利是老毛（人情）呢？凡有法律規範的條文，定必有嚴格的定義，否則，上到法庭，又是另一劑爭拗！
今屆香港特區政府，毫無法治精神可言，往往只靠鬼祟口噏便當有做嘢的「紀錄」！
一個地方政府日夜為庸廢之事補鑊，卻又怨市民唔畀機會佢哋正常做嘢，嗱！大家畀足一年時間啦！你班廢柴庸官除出醜劣行，又有乜嘢好事做過出嚟呢？請問！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
第一手消息請下載on.cc東方互動
