SUN搞作：少膽虫手記：九唔搭八
「少膽虫，爆……谷……」聽到淫賤黎吼聲，少膽虫雙手不受控制，急急往後掩，並慢慢地走入淫賤黎房間。「你做咩雙手後掩咁入嚟？我要爆谷呀！」淫賤黎用厚舌，輕舔豬唇，似要享受「大餐」。「腦細，我有啲唔舒服，所以……」少膽虫渴望可以避過一劫，換嚟嘅竟然係一句︰「你死都好，快啲拎桶爆谷畀我，我要趕住睇戲！」
正當少膽虫鬆口氣時，肥豪就邊喘氣、邊衝入淫賤黎房間︰「腦細，門口有炸彈！」霎時間，房內鴉雀無聲。「我想你連屎都冇得食！」喇叭一句電影對白劃破寧靜，「點解會有炸彈？邊個會咁夠膽？」淫賤黎開口問道。少膽虫同肥豪面面相覷，因為壹全霉屈人猶如恒河沙數，又以宣淫為己任，真係邊個都有可能。
「腦細，邊個做係後話，命仔要緊，依家着草先喇！」少膽虫衝口一句。聽到少膽虫肺腑之言，淫賤黎正要離座之際，肥豪一句︰「點解要走？」少膽虫同淫賤黎頓時火冒三丈，「又係你話門口有炸彈，仲喺度等死咩？」少膽虫不耐煩道。豈料肥豪一臉疑惑，「不過係有個內地記者坐喺門口，咁會死人o架咩？」
「可怒也！唔單止阻我睇戲，仲呃我有炸彈，肥豪你死梗！」淫賤黎咆哮。「腦細，唔係喎，係我哋將人哋描述成係『重磅炸彈』！」面對肥豪解釋，淫賤黎語塞無言。「咁係邊個報呢單新聞？」淫賤黎再問，肥豪即時望住少膽虫。
一陣慘叫聲，伴隨嘅係淫賤黎枱頭菊花變得凋殘……
