城中鏡：藺Sir為架賓利延退休
藺常念點都唔肯透露依家有幾多人工。
無見人稱「股壇開心果」嘅藺常念一排，尋日就喺智易金融集團附屬嘅智易東方證券成立慶典見到佢，原來佢做咗智易東方證券行政總裁，不過佢笑笑口話本身已諗住退休o架，但係有一日，智易金融集團行政總裁梁衛漢約咗佢傾偈，跟住佢就畀一樣嘢打動咗！
藺常念點都唔肯透露依家有幾多人工。
能夠引誘到藺Sir梗係非一般卡士啦，原來梁衛漢畀咗條賓利（Bentley）車匙佢，話如果佢應承，架賓利就日日車佢返工，就係咁，佢就答應咗！咁都不特止，藺Sir唔肯透露有幾高薪厚職，淨係話由買得起豐田（Toyota）以至Lamborghini（林寶堅尼）。哇！個range都好闊啫。
藺Sir大嘆依家證券業好難撈，話有啲行家以平佣頂爛市，又用靚女做宣傳，仲話證監會搞風險評估，係「殺雞取卵」，阻礙行業發展，所以佢去到新公司嘅新目標就係「生存」，以服務為先，幫客戶賺錢。佢教路話市場總有生存空間，要逆流而上，就要快人一步！
