梁福元（右）鍾意歎茶多過食老婆餅，唔知黎卓婷（中）會唔會重開茶樓，重拾集體回憶？左為藝人薛家燕。
元朗恆香老餅家總店重修後，日前開張，作為地膽嘅新界鄉議局執行委員梁福元都有出席。佢好回味咁話，餅家未賣餅之前係茶樓，佢最鍾意晨早去完雞地趁墟後，過嚟歎番件大包。後來茶樓冇咗，佢都有繼續幫襯，笑言最愛喺呢度搵「老婆」，不過係食得嗰隻老婆餅。
梁福元話老婆餅係元朗特產，亦係元朗人嘅象徵，佢不時到內地拜訪領導，都係抽住一盒盒老婆餅做手信。佢自爆曾經做過餅家嘅「恩人」，話說當年政府興建十八鄉公路，將餅家嘅製餅廠房劏開，餅家向梁福元求救，佢於是喺區議會上動議修改工程路線，最終獲得通過。
商品說明條例實施後，唔少貨品都怕觸犯條例而要改名，現為最大股東嘅恆香總經理黎卓婷覺得老婆餅冇需要改名：「係人都知道老婆餅入面冇老婆啦！」
第一手消息請下載on.cc東方互動
