伍偉國（右）拎住智能手機，同店員研究一番，傾到手舞足蹈。
作為家族第三代掌舵人嘅美心集團主席Michael伍偉國唔單止喺事業上推陳出新，連下載手機應用程式都快人一步。日前一個下午喺中環ifc一間電子產品旗艦店遇到Michael，當時佢手持該品牌嘅智能手機與店員傾偈，睇嚟係講緊有關手機嘅嘢。
傾咗一輪，伍偉國面帶笑容離開商店。
經過洋酒專賣店，伍偉國駐足凝望，似乎甚感興趣。
當日下午大約兩點半見到Michael一支公現身ifc，佢一手挽住個購物紙袋，一手蹺住把雨傘。見佢行入電子產品旗艦店，店員即時笑容滿面咁走上前招呼，似乎佢係熟客。Michael喺西裝褸袋內掏出智能手機，同店員一邊熱烈討論，一邊研究手機，期間仲講到手舞足蹈。
問多啲學多啲
記者上前同佢打招呼，問佢同店員傾啲乜？佢話自己不時經過該店，都會順便入去問吓最近有乜最新推出嘅手機應用程式、新產品等等，乘機學多啲嘢咁話。佢透露，最近依然馬不停蹄，到唔同類型嘅餐廳試食各種美食以作參考，務求改良集團嘅食物質素。
未幾，Michael離開該店，又喺商場內閒逛咗一陣，途中經過一間洋酒專賣店，佢駐足對住櫥窗望咗幾眼，但冇入到去。之後佢繼續向前行，兜咗幾個圈，冇幾耐就離開。
第一手消息請下載on.cc東方互動
