設計圖片
上屆立法會「五散人」提早散檔嘅故事，要由舊年嘅特首選舉開始講起。當時外號「唐英年家臣」嘅工業界林大輝，喺議會內外力撐唐唐同狂插另一候選人CY梁振英，已令其他四位想保持相對中立嘅散人敬而遠之。其後CY擊敗唐唐當選特首，大輝立志轉攻直選改行插政府路線，進一步影響改組後嘅四散人合作，以前每逢施政報告同財政預算案，各名散人齊齊開記者會回應嘅場合已不復再。
佢哋嘅前成員「波波」陳茂波做咗發展局局長後爆出利益衝突疑雲，就將大輝同保險界陳健波嘅內部矛盾表面化。大輝雖未有直接叫波波下台，但就公開狠批對方回應「擠牙膏」，同波波仲係好老友嘅健波，話無證據證明波波以權謀私做錯嘢，多次為好友護航。據聞兩人現時已幾乎無偈傾，以往本來每個禮拜定期舉行嘅散人例會，但最近已無聲無息下取消咗。
另一個加速四散人散檔嘅原因，就係「怪醫」梁家騮喇。怪醫喺上屆立會已行蹤飄忽，成日唔開會，今屆缺席情況愈趨嚴重。有傳佢已諗定下屆唔選，專心搵銀同湊仔，無咗怪醫擔當大輝同健波之間嘅「潤滑劑」，散人開會時難免有拗撬。
至於新加入嘅建築、測量及都市規劃界謝偉銓，據聞佢同健波合作得唔錯，可惜健波亦好可能玩埋呢三年就唔撈。謝偉銓具備專業背景，又熟悉地產事務，一直畀新民黨同經民聯「吼實」，隨時未換屆就會畀人撬走，令四散人正式散晒。
第一手消息請下載on.cc東方互動
