立法會放暑假，唔少議員都會出外攤抖吓，而新界西立法會議員Ben陳恒鑌就同家人去咗一個有沙、有大海，且有藍天同白雲嘅地方，咁究竟佢去咗邊呢？原來係大嶼山。阿Ben尋日喺社交網站上載咗幾張相，並留言話唔使尋尋覓覓，大家以為佢去咗墾丁，其實係去咗大嶼山長沙海灘，連三歲半嘅囡囡都話好過去沖繩，因為唔使搭飛機喎。其中有一幅相就影住阿Ben企喺塊滑浪板上，成個滑浪小子咁，但點解會喺沙上滑浪嘅？
阿Ben應我哋查詢，話呢幾日同家人去離島遊玩，順便去睇吓各島嘅民宿。前日喺大嶼山住咗一晚非洲營，尋日就喺大澳河邊一間咖啡店歎茶食Cake。佢仲話喺離島度假既有出外旅遊嘅感覺，又方便隨時返地區工作，的確係放假嘅不二之選，所以放假未必一定要出外咁話。睇嚟佢除做議員外，仲有潛質做埋離島旅遊大使喎！
第一手消息請下載on.cc東方互動
