東方電視
更多新聞短片港大法律學者戴耀廷等三人發起嘅佔領中環行動正搞得如火如荼，建制派先有號稱代表共十萬會員嘅香港島各界聯合會發起「守護中環」行動，之後到由高達斌為首嘅「愛港之聲」發起一萬人抗衡佔中，不過一直未得到外界太多關注，尋日再有一個號稱自發嘅「幫港出聲」行動出現，宣布主力透過社交網站爭取十萬人發聲，最巧合嘅係同佔中一樣，當中都有兩名學者出任召集人，呢場學者矛盾之戰可謂一觸即發。
設計圖片及對白
呢個「幫港行動」由約四十名學者、商界同專業界別人士組成，其中資深傳媒人周融、中大客座教授鄭赤琰、嶺大公共政策研究中心主任何濼生、廣東社團總會主席王國強、金匯國際集團有限公司主席馮家彬同創新科技協會會長李榮貴六人為召集人，其中後兩者都係富貴黨成員。
講番尋日「幫港出聲」行動記者會，周融、何濼生同鄭赤琰三人主力發炮狠批「佔中」，其中周融一時發表「正邪論」自言想香港穩定就係「正」，想攪亂香港就係「邪」，一時又話點解有人會將把嚇人嘅刀架喺港人頸上，鄭赤琰則反駁泛民某些普選睇法，直言要做到「一人一票等值係冇可能」；至於科大經濟學系教授雷鼎鳴亦有現身支持並發言，佢大鬧佔中係「不道德」，直斥有人話學術界支持佔中係「亂噏」，認真語不驚人勢不休。
傳連鎖電器商泵水
至於「幫港出聲」行動資金何來，周融話係由約四十人出錢出力，大概每人五千至十萬元，至今籌得一百多萬元，估計可以用到兩至三個月喎，另有知情人士更爆料，某連鎖電器商戶老闆亦有「泵水」力撐呢個行動喎，究竟「幫港出聲」能否擺脫前人「雷聲大，雨點小」嘅通病，就要睇下佢哋有乜奇招喇！如果要搵呢個組織可以上facebook搜尋Silent Majority。
第一手消息請下載on.cc東方互動
