SUN搞作：打橫嚟講：香港廢柴政治，連一條街也管唔掂！
旺角西洋菜街，繼幾年前有喪心病狂的擲鏹水事件後，日前，再有三千人麕集對峙的政治活動，這兩單嘢，應算自成立「行人專用區」以來，最重大的事故了！
西洋菜街由一條行車馬路，改為「行人專用區」，原意有四大宗旨，除了改善旺角空氣污染外，更是闢出空間，供市民休閒「散步」之用，本沒有壓迫感受的，點知，先有不法商人（多是電訊商），走法律罅，在此擺檔兜生意；近一年，更亂得不成世界，簡直回到五六十年代的九龍城寨般，三不管，尤其是警方的放軟手腳，令這處藏污納垢，不良勢力正在形成，但香港廢柴政府卻不聞不問，話知佢死！
一班日夜在此搵食的「工友」，每天爭地盤、霸地（先到先得），幾乎日日都有爭執發生，但政府部門卻互推責任；警察唔理，食環署睇唔到，消防無人投訴就唔做嘢，所以，這條街除本地陀地外，還引來大批「內地丐幫」以表演作幌子行乞，香港廢柴政府話，只要呢度啲表演者「無直接」收錢，便不算「做生意」，但香港《簡易程序治罪條例》第26A條「對乞取施捨的人的懲罰」規定，行乞就是違法行為，咁點解無人執法的呢？咁比較簡單兼能起到作用的事，廢柴政府都不懂去做，難怪較複雜的政治問題，會搞到一Pat屎咁啦！
呢個庸廢的香港特區政府，連一條街也管唔掂，叫佢哋如何搞好香港呢？
香港原是個講法治的地方，若要有效管理西洋菜街，唔該「修例」，講清楚呢處「行人專用區」的主旨，好讓大家有法可依，但謊言政府卻任由呢度無王管，愈亂愈好！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
