城中鏡：劉健儀放金牛試外傭
劉健儀到入境處請願，要求修例杜絕外傭呃回鄉機票錢。
自由黨榮譽主席劉健儀（Miriam）尋日帶隊去入境處請願，向來以中產發言人自居嘅富貴黨好關注本地家傭僱主權益，Miriam講到請外傭嘅心得，就透露自己好好彩未撞到啲差嘅外傭，但佢都會「測試外傭」o架，其中一招都出晒名，就係喺家中當眼位置擺幾張金牛，過幾日就睇吓金牛有無不翼而飛，「重金」之下一定試到外傭有幾老實喎。
劉健儀到入境處請願，要求修例杜絕外傭呃回鄉機票錢。
佢哋尋日去入境處，主要係關注現時《外傭條例》規定，僱主必須幫離職外傭支付回鄉機票費，但《入境條例》只規定外傭要喺十四日內離開香港，但無講明要返家鄉，搞到唔少外傭偷雞去澳門、深圳等地「過冷河」，然後過一排再到香港打工，激到班僱主紮紮跳，尋日富貴黨就同班苦主踩上入境處示威，要求檢討條例。該黨外傭關注組召集人李鎮強話，僱主支付外傭回鄉機票錢好合理，但如果離職外傭攞咗筆錢又唔係返家鄉，咁即係呃錢。
