設計圖片及對白

近排發展局兩個政治問責官員都被指涉利益衝突，但政治助理何建宗就即刻辭職、同做咗七個多月嘅職位拜拜得瀟瀟灑灑。據講，何建宗起初出任發展局政助時都係「半推半就」，因為呢個位置根本唔係佢原本想做嘅。消息指，何建宗去年年中遴選副局長同政助面試時，其實首選係做環境局副局長，但呢個位最終由前立法會議員陸恭蕙跑出，或者入政府冇做到自己最想做嘅，佢咪好痛快求去囉。

設計圖片及對白

新政府去年七月上任後分批公布副局長同政助任命，做過長春社、又曾獲委任為古物諮詢委員會成員嘅何建宗一向對呢瓣有興趣，咪入紙申請囉，可惜佢最終被委做發展局政助，有知情人士話佢一直對古蹟保育工作有研究，以為有機會喺呢個範疇大展拳腳，所以先會應承做呢個崗位，豈料至日前辭職離任前，幾乎無乜機會觸及相關工作。加上被揭發漏報家族喺新界東北擁有廠房，既然官場唔啱自己所想，有志難伸，又唔想家人再受影響，咪決定走囉。

有官場中人相信，何建宗辭職後其實亦一片海闊天空，一來過咗冷河期後接管家族生意，二來佢呢次處理風波乾淨利落，或者有助佢將來「東山復出」出任公職喎。

第一手消息請下載on.cc東方互動iPhone/iPad/Android/Windows Phone Apps