政壇：梁粉網上平台取代GIS？
自從落區遇衝擊後，特首梁振英（CY）被指好耐都無落區，今個星期日佢會再次出動，不過呢個消息，政府新聞處（GIS）一直未有正式公布，反而由「梁粉」組成嘅網上平台「港人講地」，尋日就講明CY會去天水圍天晴邨社區會堂，仲話當日九點鐘開始派籌，比一眾傳媒更清楚內情。如果唔知道，分分鐘以為「港人講地」取代咗GIS。
透露CY周日落區
「港人講地」曾經多次報道官方消息，尋日就透露CY周日落區嘅社區會堂，只能容納三至四百人，所以朝早九點當局會開始派籌，報道內容非常精準。
不過老實講，幾點派籌呢啲訊息，理應由GIS一次過發放，但偏偏現時GIS到尋日都好似唔知咩事咁，對外完全無公布CY落區一事。
其實「港人講地」經常轉載政府高官發言，又喜歡引用撐政府網民製造嘅政治漫畫，可以話係CY嘅私人「新聞處」，專責幫梁班子造勢。但下下都繞過新聞處，利用非官方渠道發放官方訊息，唔知新聞處處長有咩感受呢？定係已經習以為常？
