政壇：張華峰鬧李小加無成績
張華峰
立法會議員張華峰對港交所行政總裁李小加有不滿，冇幾耐前，先喺飯局中火併過。尋日張華峰出席一個午餐會時，提到李小加掌舵港交所呢四年，佢又開炮話港交所嘅股價節節下挫，李小加一啲成績都交唔到出來，簡直令業界非常失望。依家中小經紀行愈執愈多，張華峰身為金融服務界嘅議員，或者真係谷爆了！
張華峰
張華峰話，由海歸派嘅李小加接掌港交所以來，將香港由一個本來係為企業融資嘅平台，變成一個高風險嘅投機市場。喺唔公平、唔合理嘅制度下，令到唔少小投資者損失慘重，紛紛離場，導致港股成交萎縮。同一時間，港交所又以同國際接軌為名，推出多項新政，收窄中小券商嘅經營空間，好似港股加時、扣減飯鐘咁，搞到經紀無啖好食之餘，亦都唔能夠利用午飯時間，同客戶做聯絡及推介工作，生意大受影響。
講到夜期，張華峰一樣照鬧，佢話加重咗券商營運成本，好多時夜期每晚都只得二、三千張：「唔做又怕客戶流失，做又未夠交燈油火蠟」，搞到券商進退兩難。就連去年斥巨資買番嚟嘅LME（倫敦金屬交易所），依家又話被人控告。
咁多問題，難怪張華峰愈講愈慶喇。
