政壇：鼠王芬李偲嫣肉麻互挺

被拖落水嘅梁美芬喺網上撐李偲嫣，而李更對梁美芬美言多多，話最難忘梁美芬嘅甜美笑容同大板牙喎！有鼠王芬之稱嘅梁美芬喺議會經常展示牙力，今次老友中招，佢梗係出牙（口）相助喇！

難忘笑容同大板牙

李偲嫣同梁美芬雖忙於「女人當自救」，但為免再有傳媒亂報道，李偲嫣尋日主動解釋當年同梁美芬嘅相識經過，佢話同梁美芬相識於○七年冬天，當時李偲嫣有位朋友係梁美芬嘅法律系學生，但兩人真正熟落，可以坐低傾偈就係○八年春天，同梁美芬一傾偈，李就發覺大家非常投契，總會有傾唔完嘅話題，有時面對面傾偈都仲未夠，仲要煲電話粥個幾兩個鐘至得。

由於兩人實在太啱KEY，所以李偲嫣好快就被梁美芬睇中，邀請佢以兼職身份擔任「項目主任」，專責教育議題。李偲嫣話當時仲要照顧幼兒，咁啱呢份工唔困身，自己又喜歡教育，所以就一口應承。

除咗理念相近，李偲嫣話梁美芬有兩樣嘢係最令佢難忘，第一係佢副甜美笑容，第二就係佢一雙大板牙喇。政圈好似冇乜聽過有人咁樣形容梁美芬喎，李偲嫣睇嘢可算別具一格。身為老友嘅梁美芬尋日都喺網上發聲撐李偲嫣，話就算李偲嫣破過產，公眾都唔應該歧視佢，而佢聘請李偲嫣更加係公開嘅事，好榮幸可以同佢合作咁多年喎。