城中鏡：左影影：李業廣自謙非H股功臣
有股壇教父之稱嘅李業廣出席H股登陸香港二十周年活動。
香港金融業發展迅速，話咁快H股登陸本港股市已二十年，尋日港交所搞咗個慶祝儀式，有股壇教父之稱嘅港交所前主席李業廣都有出席，仲成為全場焦點，大家成日話，冇李業廣就冇H股，但李業廣卻話，當年時任副總理嘅朱鎔基先至係H股來港上市最重要人物。
有股壇教父之稱嘅李業廣出席H股登陸香港二十周年活動。
李業廣話，事關九三年中國都未有公司法、證券法，會計制度又未同國際接軌，內地企業來港上市當時的確好艱難，有人甚至話不如成立另一個專為中國公司上市而設、質素較低、買者自負嘅上市平台就算，但朱鎔基當年卻很有遠見，認為毋須對內地公司作特別處理，一錘定音話要按照國際標準來港上市，即係話訊息披露、會計制度、投資者保障等，統統都要符合國際標準。六月底，H股市值已達四點二萬億元，如果連埋紅籌同民企，市值更高達十一點五萬億元，佔總市值逾半壁江山（百分之五十五點九），內地企業成交額佔總成交高達百分之七十一。可見當年嘅決定對香港有幾大嘅影響。
