SUN搞作：打橫嚟講：香港病了！愈亂愈好？
前日，本報標題：「香港病了」！確實，香港特區病入膏肓矣！
回歸後，香港政府管理層，由懵懂商人到貪腐縮骨仔，至現任政府，真係一蟹不如一蟹，沒有最差，只有更差！
老董和貪曾之衰，已叫港人想死，但怎也不及當今咁WTF！
以前，港英年代，一切「政治衰嘢」未見光，已早先搞掂後「出台」，到老董貪曾時期，即使避無可避的（鬼叫要聽上頭話咩！）也會鬼鬼祟祟，暗中做手腳，枱面乾乾淨淨的，因為衰極都仲講點廉恥嘛！家陣！唉！已肆無忌憚，毋須遮掩的行惡了！
一九六六年，文革前夕，北京清華大學附中的紅衞兵寫信給毛澤東，兼有他們的大字報，內說：「我們就要掄大棒、顯神通、施法力，把舊世界打個天翻地覆，打個人仰馬翻，打個落花流水，打得亂亂的，愈亂愈好！」並得到老毛支持：「天下大亂，才能天下大治」喎！
今天，香港重病，亦因有人惟恐天下不亂，每每唔依正路做事，只以謊言偽語欺下瞞上，顛倒是非混淆視聽，枉法徇私包庇低B，咁都不特止，仲放任暴力團體欺凌弱小，學晒老毛咁拉一派打一派，激化社會對立點，製造仇恨情緒，加速矛盾兩極化，依家，連問責班子與公務員的撕裂也白熱化起來，長此下去，香港如何和諧安居樂業呢？又如何不積憤呢？又點會唔病呢？
病向淺中醫，是至理名言，也是治世良方，只有心存歪念的窩囊廢，才想趁亂博懵攞着數！
救港方法，係先看清楚庸官，繼而掃走禍國精。最終，係人們自行個個有份選賢能，香港咁先有得救！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
