政壇：搞搞政：黑英籲多維思考 避衝突
設計圖片及對白
小學女教師以英式粗口鬧警察一事驚動正反陣營各自吹雞，最終引發近三千人佔領旺角西洋菜南街行人專用區對峙。天文台前台長林超英（黑英）都有留意此事，但佢唔正面評論林老師爆粗事件，改為講吓歐洲中世紀歷史，黑英話，其實件事緣於對「正義」定義嘅分歧，可惜呢個世代嘅香港愈來愈二分化、凡事非黑即白，忘記咗好多嘢都可以「多維」（multi-dimensional）分析。黑英噴口水花目的都係想人多啲角度睇嘢。
設計圖片及對白
黑英預言，如果香港再係咁落去，就淪落到好似歐洲中世紀獵殺女巫，同法國大革命時期利用斷頭台將「反革命分子」斬首咁殺害異己，到時就萬劫不復喇。獵殺女巫？黑英咁講係咪指林老師被人當「女巫」「獵殺」？黑英似乎有口難言，淨係話依家最關注保育同教育「兩育」，總之呼籲大家唔好當正自己係道德判官，要從多角度睇「正義」呢回事，做到理直氣「和」，咁就好喇。
其實，林老師事件都係教育界好關注嘅事，計正屬於黑英關注嘅兩件範疇中，只係佢唔想捲入已經過激嘅紛爭中，惟有叫人冷靜、多維咁睇嘢囉。
