政壇：旺角行人區縮時間 冇人敢掂
旺角行人專用區是否縮短開放時間掀爭議。
旺角行人專用區一星期七晚都吸引大批街頭樂隊、小販同雜耍賣藝人獻藝，火氣旺盛嘅政黨團體更周不時喺度搞論壇，住樓上嘅街坊飽受噪音煎熬。油尖旺區議會上月咁啱討論大幅縮短專用區開放時間至一星期兩日，但最終因為時間倉促而趕唔切拍板。不過，據悉實情係區議會同政府都唔想做「醜人」，總之大家卸得就卸、拖得就拖。
旺角行人專用區是否縮短開放時間掀爭議。
現時旺角行人專區逢周一至周六下午四時至晚上十時開放，周日同公眾假期仲提早至中午十二時開放，當區區議會一個委員會動議縮短行人專區開放時間至星期五、六兩日，唔少議員即使心入面支持，但都覺得呢招「太辣」，因為措施勢必引起喺專用區搵食嘅商戶、表演者甚至支持本土文化嘅團體強烈反彈，油尖旺區議會主席鍾港武透露，有關建議實在好難達成共識，反建議政府修例、設附屬法例或設立發牌制度，規管表演者數量同出場時間，同時監管電訊商易拉架佔據專區嘅亂象，將個波踢番畀政府。佢仲話，即使政府願意修例，但當局做嘢動輒以年計，行人專區問題恐愈來愈難搞。
另一方面，日前行人專區發生二千人就爆粗女老師事件對峙場面，如果區議會十一月開會貿貿然表決通過有關動議，一定會被扣上「打壓集會及言論自由」嘅帽子，亦無助解決同樣嘅鬧劇會喺星期五、六嘅行人專區重演。睇嚟，上址你有你投訴、我有我高歌嘅現象有排拖。
