政壇：周轉香盼離島變環保鎮
周轉香（右）同徐莉齊向離島區婦女灌輸環保意識，減少廚餘。
「惜食」減廢成為近期熱話，離島婦女聯會主席周轉香（香姐）原來早於年前已經推動廚餘回收，喺梅窩嘅試驗計劃成效顯著，未來仲會陸續於長洲及坪洲推行，並開設社區農莊及花園，佢希望將離島打造成小環保鎮。
周轉香（右）同徐莉齊向離島區婦女灌輸環保意識，減少廚餘。
島民知慳識儉易推廣
日前香姐同該會副會長徐莉（Eileen）現身一個活動時話，唔少人都認為，離島區居民大多來自基層，教育水平較低，難以向佢哋灌輸環保意識，但事實上剛好相反。香姐話，地區婦女懂得知慳識儉，減少廚餘話咁易，唯一執行比較困難嘅地方，係要改變中國人傳統覺得「每餐要食剩嘢先等於富有」嘅觀念。
香姐話，唔少環保專家都自願做義工，研究將廚餘化為有機肥料，供給梅窩居民耕作，達至環保目的。身為老友嘅Eileen都大力支持，佢話咁啱身邊有好友開設有機農田，需要大量有機肥，佢亦樂於做「中間人」，將離島有機肥推介畀老友。
