政壇：任總細數粉嶺別墅歷史
新界東北發展計劃辣起多處火頭，有環保團體建議收回一九三四年落成嘅港督粉嶺別墅地皮建屋。本身係粉嶺高球會會員嘅金融管理局前總裁任志剛（任總），尋日喺一份報章以「粉嶺別墅」為題撰文，洋洋萬字講解自己喺八十年代，代表英方去粉嶺別墅參與秘密會談嘅前前後後，連國務院港澳辦前主任魯平邀請佢喺無回鄉證下闖關踏進內地嘅一事都記低，唔講仲以為任總寫旅行日記！
文章起首提到回歸前嘅粉嶺別墅，發生咗好多鮮為人知嘅重要事件，任總以自己比港澳辦前副主任陳佐洱早三年去別墅參加秘密會談作引子，自稱身為中國人，要代表英方參加中英談判「感到迷茫」，但原來佢同時仲要做「跑腿」，接載中方成員由文錦渡坐直升機到別墅，回程時就獲魯平邀請佢由文錦渡踏進中國境內。佢仲提到，當時英方就貨幣管理嘅「新會計安排」由佢一手設計，別墅書房更孕育出後來由佢打骰嘅金管局添。
任總將話題扯到咁遠，文末終於「言歸正傳」補充一句：「懇請各方人士，高抬貴手，放過粉嶺別墅吧！」其後任總回覆報章查詢時話，佢只係忠於自己嘅感覺撰文，從歷史角度抒發對粉嶺別墅嘅回憶喎。
