政壇：蓋茨基金重能力輕沙紙
每年暑假都係大批畢業生離校投入社會嘅時間，有啲揸住沙紙嘅大學生都會感覺搵工、擇業難。其實，佢哋應該睇吓微軟創辦人蓋茨嘅經歷，咁就會明白一個人有冇成就，唔係睇佢有冇「沙紙」，而係有幾投入自己嘅事業，而且，沙紙唔代表工作能力。或者係咁，蓋茨旗下嘅基金都搞咗個計劃，鼓勵僱主請人嘅時候，以能力行先，而唔係學歷。
近日蓋茨基金同Innovate+Education合作開創一個新計劃，名為「新選擇」，呢個計劃係一個介乎喺傳統大學同職業訓練學校嘅新猷。計劃推行後，唔同地區嘅僱主，都可以同「新選擇」合作，成立認可課程。咁應徵者只要參加僱主認可嘅課程同測驗，展現自己有相關嘅技術，就可以得到專業培訓嘅機會。
