政壇：長毛帶兩梳蕉舉報波波
長毛（左二）等社民連成員在廉署總部外篤爆多個黑色氣球，揶揄陳茂波「黑過墨斗」。
發展局局長陳茂波家人被指囤地，多個泛民政黨日前已向廉政公署舉報陳涉利益衝突，可能構成俗稱「以權謀私」嘅公職人員行為失當罪。其中一位報案人係社民連立法會議員長毛梁國雄，長毛尋日應邀去錄口供，佢兩手空空，同以前有啲舉報人準備文件、最少都有剪報好唔同，大家問長毛有冇咩資料，佢理所當然咁話：「佢哋（廉署調查人員）睇報紙得喇！」
長毛（左二）等社民連成員在廉署總部外篤爆多個黑色氣球，揶揄陳茂波「黑過墨斗」。
長毛尋日同多名社民連成員一齊到廉署位於北角嘅總部，佢哋喺廉署外拉起橫額及高叫口號示威，又篤爆多個黑色氣球，以此諷刺陳茂波「黑過墨斗」，需「篤爆」才可看清事實。
之後長毛上咗廉署，逗留半個幾鐘，佢事後引述廉署人員話會據相關法律及既定程序處理有關個案，但無交代是否已正式立案調查。長毛仲話，陳茂波雖申報咗利益，有申報不代表毋須處理有關利益衝突。
