政壇：陳維安禪修食齋紓壓

改飲食方式應付議會

Kenneth係天主教徒，但佢過去都試過禪修幾次，而佢今次去完禪修之後，突然覺得食齋「幾舒服」，因此做咗呢個決定。不過，佢仍然會食蛋同飲奶：「唔飲奶就冇得飲咖啡o架喇！」佢轉食齋後，屋企人似乎冇特別遷就佢，平時喺屋企食飯都係煮多碟菜。由官場跳入議會秘書處，Kenneth都走唔甩拉布苦惱，搞到要改變飲食方式來應付；咁如果仲喺官場又點呢﹖近排多名問責官員同行政會議成員都因為涉及利益衝突等問題而搞到周身蟻，甚至要辭職，Kenneth點睇呢﹖會唔會唔想再返政府工作呢？佢話，秘書處要保持中立，所以唔會評論喎。

講番立法會嘅工作，議會正向政府申請增撥資源，希望可以增聘人手處理立法會工作，預計九至十月有結果。作為議會大主管，Kenneth卻認為請人係頭痛事，立法會咁多職位中，議會秘書就最難請，因為好多人都唔係好知議會秘書係做咩，而且至少要六年工作經驗，所以過往去大學搞簡介會原來都係多餘嘅，啲畢業生聽完簡介會都係見唔到工。佢依家就諗緊接觸啲專業團體，睇下點樣可以吸引到人入行。